الزعيم 1
نظيف: وبعدين يا زعيم البلد كلها مقلوبة علينا اليومين دول هنعمل ايه؟
الزعيم:امال انا جايبك ليه يا خويا هو انت اللي بتسألني؟ واضح اننا زودناها شوية في الفترة الأخيرة
غالي: لأ ومتضايقين اوي من اعلانات الضرايب بيقولوا مستفزة مع ان النجم شومان دمه خفيف مووت ..
نظيف: ماهو برضه يا غالي الإعلان بيستخف اوي بالناس فوترني ايه وهبـِّـلني ايه وبعدين هو فيه حلاق هيديك فاتورة يا دغف..!!
غالي: متحسّن ملافظك يا نظيف ايه الكلام ده..
الزعيم:ايه يا ولاد هتتخانقوا قدامي ولا ايه؟..
نظيف: العفو يا ريس بس هو مستفز اوي واعلاناته سطحية
الزعيم:طيب سيبك منه دلوقتي ايه الحل في الحركات الجديدة اللي طالعة دي؟
نظيف: قصد حضرتك "احترم نفسك"
الزعيم: ايه احترم نفسي دي يا نظيف انت اتجننت؟
نظيف: لا دي حركة يا فندم معمولة جديد ضد التحرش
الزعيم:هو احنا عندنا تحرش في مصر؟
نظيف: يعني كانت حاجة بسيطة كده يا فندم بس الحمد لله انها غطــّت اصلا علي قضية الفتنة اليومين اللي فاتوا بين الاقباط والمسلمين
الزعيم: فتنة؟ في مصر؟
نظيف: احم احم.. دي حاجة بسيطة يا ريس بس الحمد لله دي اصلا اهْون من قضية التزوير في انتخابات المحليات اللي كانت قالبة الدنيا
الزعيم: تزوير؟؟ في مصر؟؟
نظيف: يا ريس واللهي متخدش في بالك دي سطحيات كده وخربشات واهي بالمرة غطت علي موضوع العبارة وبراءة صاحبها اللي موت الف وشوية
الزعيم: عبارة غرقت؟
نظيف: معلش يا ريس ليه سؤال..هو حضرتك منزلتش الشارع من فترة؟
الزعيم: بنزل بس محدش بيجيبلي الأخبار دي وبعدين بيفتحولي دايما القناة الفضائية المصرية وبيجيبولي كل يوم الأهرام والأخبار والجمهورية..ومش شايف أي مشاكل
نظيف: عشان كده
الزعيم: ايه اللي عشان كده؟
نظيف: يا ريس احنا اللي بنعمل الجرايد دي عشان خاطر سعادتك تتبسط ومتقلقش..
الزعيم: يعني بتكدبوا عليا يا خونة ..كلااااااااب..كلكم كلاااااااااب
فتحي سرور: ايه يا زعيم انت هتعيش في الدور؟..هيعيشلي في دور الراجل اللي اتخان بقي وكده وبتاع وشاي بالنعناع والفيل أبووو بتاع !!
الزعيم: انت تخرس خالص ..بقي في تزوير في مصر؟
فتحي: امال انت قاعد ازاي يا حيلتها؟
الزعيم: برأي الشعب
الوزراء: ها ها ها ها ها ها ها
الزعيم:احم..طيب ايه حل المشاكل دي يا جماعة ..؟
طارق كامل: بما انك بتحب وزارة الاتصالات يا ريس انا اللي هاجيبلك الحل..
الزعيم: تسلم يا طارق والله النت اللي دخلتهولي انبارح ده كان محترم ومن ساعتها بدخل مواقع ســـيــــ
احم.. سياسية يعني وكده
طارق: انت بتحب وزارتنا..رئيس الوزارة منها وكمان اللي هيجيبلك الحل منها..
الزعيم: قول يا عمنا
طارق كامل: بص يا ريس هنمشي بقاعدة اللي يعرف ابويا يروح يقولــّه..
الزعيم: كلام سياسي محنك والله
طارق كامل: يعني يا ريس كل حاجة نرمي مسئوليتها علي جهات بعيدة عننا وباستخدام التكنولوجيا
الزعيم: ازاي يعني
طارق كامل: ده عرض للمشروع بتاعي:
مكافحة تحرش اتصل علي 19900 مكافحة غلاء اتصل علي 19700
مكافحة فساد اتصل علي 19500
لما تشوف السحابة السوداء اتصل علي 19300
لما تشوف فساد في المستشفيات اتصل علي 19200
لما النت عندك يبوظ اتصل علي 19555
لما تتضايق اتصل علي 19585
لما تشوف حلمة ودنك ..متتصلش
الزعيم: ده عين العقل والله يا طارق انت عبقري يا ابني ..وبكده الناس تتصرف مع الأجهزة دي واحنا بعيد وحلوا مشاكلكوا بقي
طارق كامل: طبعا يا افندم واحنا عملنا حسابنا وقفلنا كل الخطوط دي اصلا بس عملنالها دعاية جامدة عشان محدش يقول اننا مبنعملش حاجة
الزعيم: مبنعملش حاجة ازاي يا طارق
طارق: كان بعض الملاعين بيشككوا في انجازاتنا رغم ان انجازاتنا كتيرة قوي
الزعيم: زي ايه يا طارق فكرني
طارق: يقولهالك نظيف بقي يا فندم
نظيف: يقولهالك غالي بقي يا زعيم
غالي: يقولهالك فتحي بقي يا زعيم
فتحي: انجازااات..انجازااات.انجازااااات..طيب سيبني افكر
الزعيم: تفكر؟ يعني ايه؟ لازم الشعب كله يعرف انجازاتنا وتنزل بكرة في الاهرام وصفح اولي كمان
نظيف: تمام يا افندم
وبعد كام يوم
الأهرام الصفحة الأولي:
انجازات الحزب الحاكم:
رخصنا وجبات الأطفال ومعاها لعبة هدية كمان..وماكدونالدز لسه عنده الوجبة ام خمسة جنيه
عملنا سباق اليخوت في بورتو مارينا
راقبنا الأسواق في سبينس ومترو وهايبر ماركت
وصلنا الانترنت لحد 24 ميجا
عملنا سباق طيارات كمان في مصر
دخلنا الفانوس الصيني اللي بيرقص ويطلع دخان مصر
دخـّــلنالكم خدمات جديدة جدا زي خدمة "رنتك باسم حضرتك "
مشروع الوصلة العظيم وكل الناس دلوقتي تشوف ميلودي والشوتايم
ونتواصل دائما معكم شعارنا دائما
" من حكم في شعبه فما ظلم"..
الي اللقاء مع انجازات جديدة
الموضوع منقول ولكن قمت بإضافة وحذف وتنسيق مايلزم ولكن كل الشكر لصاحب الموضوع الأصلي
نقلاً عن وللمزيد: http://peaceyaman.blogspot.com
نقلاً عن وللمزيد: http://peaceyaman.blogspot.com
This entry was posted
on Sunday, November 09, 2008
and is filed under
Comedy,
قصص
.
You can leave a response
and follow any responses to this entry through the
Subscribe to:
Post Comments (Atom)
.
كويس..بس بص ياريت تبقي تكتب تحت اسم المدونة المنقول منها في اي موضو عموما ودي نصيحة لوجه الله عشان محدش يفهمك غلط انك بتنقل وكده يعني..اوك؟
عموما مدونة جميلة ونايس وورك..
شكرا يا معتز انا عايز أقوللك إني هاعمل كدة طبعا واكتر من كدة كمان بس لسة بعمل تنسيق حلو وكدة يعني
ولو كانت نيـّتي وحشة كنت عملت إدارة وتحكم على التعليقات بس طبعا مش هعمل إلا في ظروف الخروج عن النص
وشكرا مرة تانية